Mae Guto yn caru treulio amser gyda’i Nain.  Trip cwch i Iwerddon, picnic ar lan y môr, fflagiau semaffôr a thylwyth teg yn troi plant yn selsig!

Ona mae’r antur fwyaf eto i ddod…

Wedi ei ysgrifennu gan Gwyneth Glyn, mae Ŵy, Chips a Nain yn ddarlun gonest o bwysigrwydd cariad, cyfeillgarwch a hwyl rhwng dwy genhedlaeth wrth wynebu bywyd gyda dementia.

7 neu 70 oed – dim ots! Dyma sioe i’r teulu oll.

Cynhyrchiad ar y cŷd rhwng Frân Wen a Galeri, Caernarfon gyda chefnogaeth gan Academi Gofal Cymdeithasol Pendine yw Ŵy, Chips a Nain.

ADNODDAU

Pecyn Creadigol Ŵy Chips a Nain
Pecyn Dysgwyr Ŵy Chips a Nain

CROESO I BAWB

Mae Fran Wen yn ymgeisio i greu cynyrchiadau sydd yn hygyrch i bawb.

Mae pob perfformiad o Ŵy Chips a Nain yn hamddenol ac yn addas i bawb.

Rydym wedi dilyn canllawiau West Yorkshire Playhouse er mwyn sicrhau bod y cynhyrchiad yn Ddementia Gyfeillgar.

Mae’r criw artistig i gyd wedi cymryd rhan mewn sesiwn hyfforddi Ffrind Dementia gan Cymdeithas Alzheimer’s Society er mwyn meithrin ymwybyddiaeth o elfennau ymarferol all beri gofid i aelodau bregus o’r gynulleidfa.

Mae’r camau canlynol wedi eu cymeryd wrth gynhyrchu a chynllunio Ŵy, Chips a Nain er mwyn ei fod yn hygyrch i bawb:

• Ni fydd unrhyw synau/delweddau dychrynllyd neu annisgwyl yn y sioe.
• Ni fydd goleuadau sydd yn fflachio yn cael eu defnyddio yn y sioe.
• Rydym yn osgoi duwch llwyr, a bydd llwybrau mewn ac allan o’r awditoriwm wedi eu goleuo trwy gydol y sioe.
• Mae’r defnydd o fwg yn cael ei fonitro yn agos ac yn cael ei gadw i leiafswm.
• Rydym yn croesawu arweinyddion grŵp neu unigolion i ddod i asesu ac ymgyfarwyddo gyda’r gofod cyn y perfformiadau.
• Rydym yn esbonio i staff blaen tŷ fod y perfformiadau yn hamddenol a bod y gynulleidfa yn cael mynd a dod o’r theatr fel y mynnir.
• Roedd ein dewis o leoliadau wedi eu selio ar ganolfannau oedd wedi derbyn hyfforddiant ffrindiau dementia wrth benderfynu lleoliadau’r daith.