Dewch efo ni i gyfarfod Dan a Dicw y Gaeaf yma – dau berson o fydoedd hollol wahanol i’w gilydd.

Mae Dicw’n fachgen bach petrus. Yn ei fyd modern, technolegol, mae’n hawdd ymgolli a threulio oriau mewn gemau ac yn gwylio fideos. Dydy o ddim yn un i ddringo coed a chrwydro coedwigoedd ac ymgolli yn ei ddychymyg.

Rydym ni gyd yn ‘nabod plant fel Dicw. Ond pan mae’n cael ei ddanfon allan o’r tŷ un prynhawn, mae’n taro ar Dan – creadur od ar y naw sy’n byw yn wyllt, ac felly’n byw bywyd sy’n hollol wahanol i un Dicw.

Mae’n rhaid i’r ddau ddod o hyd i ffordd newydd o gyfathrebu – ond sut?

Mae Twrw Dan a Dicw gan Manon Steffan Ros yn dilyn stori dau berson wrth iddynt ddygymod gyda’r anghyfarwydd drwy chwarae a cherddoriaeth.

Sioe theatr Gymraeg i ddisgyblion cyfnod allweddol 1 (oed 3 i 7).

Teithio ysgolion Gogledd Cymru rhwng 5ed o Dachwedd tan 14eg o Ragfyr 2018.